اپنے بالوں کی صحت کے لئے آپ کو روزانہ اپنے سر پر مناسب طریقے سے مالش بھی کروانی چاہیے،کیونکہ بالوں کی صحت کے لئے صفائی اور ان کی جڑوں میں روز کوئی صحت بخش غذا پہنچانا اور خوش وخرم رہنا بہت ضروری ہے۔اگر مالش اچھے طریقے سے کی جائے تو اس کا نتیجہ بہت اچھا نکلتا ہے۔ روزانہ پانچ منٹ کی مالش نہ صرف آپ کے بالوں کو نئی زندگی دیتی ہے،بلکہ ان کی جڑوں میں غذا چوسنے کی قوت بھی بڑھا دیتی ہے اور اس بنا پر بالوں کی تعداد اور خوبصورتی بڑھ جاتی ہے۔ اس عمل سے کھوپڑی کے دوران خون میں تحریک پیدا ہو جاتی ہے اور باریک رگوں کا جال خون سے بھر جاتا ہے۔اس طرح بالوں کو بھرپور غذا ملنے لگتی ہے۔ مالش کا اچھا وقت صبح کا ہوتا ہے،لیکن رات کو بستر پر جانے سے پہلے بھی مالش کرا لینی چاہیے۔ مالش سے خون کھوپڑی میں آزادی کے ساتھ دوڑنے لگتا ہے،اس لئے سر کی مالش بہت سکون بخش ثابت ہوتی ہے ۔نیز یہ جلد کے لئے بہت مفید ورزش بھی ہے۔ مالش انگلیوں کے پوروں سے کرنی چاہیے۔انگلیوں کو بالوں میں ڈال کر نرمی سے ہلانا چاہیے،تاکہ اُن کے ساتھ سر کی جلد بھی ہلنے لگے،اسی طرح بار بار کرنا چاہیے۔جب دوران خون کی وجہ سے کھوپڑی پر سُرخی جھلک آئے اور تھکے ہوئے عضلات کو آرام ملنا شروع ہو جائے تو مالش ختم کر دیں۔ مالش سے پہلے سر پر روغن بادام یا روغن زیتون کی چند بوندیں ٹپکا لینی چاہییں،ایسا کرنے سے بال ٹوٹنے سے بچ جاتے ہیں اور ان کی چمک بھی بڑھ جاتی ہے۔ مالش کے بعد سر میں کنگھا کر لینا چاہیے۔ مالش بالوں کو نرم،چمک دار اور خوب صورت بنا دینے کے ساتھ ہی سر کی خشکی کو بھی یقینی طور پر دور کر دیتی ہے۔معمولی مالش بھی سر کی خشکی کا بہترین علاج ہے۔ایسی صورت میں مالش کا اچھا طریقہ یہ ہے کہ پہلے سر کے بالوں کو پھیلایا جائے،پھر انگلیوں کے پوروں سے مالش کی جائے،مگر سر کو زور سے رگڑنا نہیں چاہیے۔ دن میں دو مرتبہ مالش کرنی چاہیے اور مالش کے بعد کوئی معیاری تیل لگا لینا چاہیے۔